ثانوية عامة ومبتدأتش مذاكرة لحد دلوقت وعلمي رياضة، اعمل ايه؟
ج / ماتعملش حاجة.
دور على مسلسل حلو والباقي سوشال ميديا يمكن تتناسى شويه الضغط وتأنيب الضمير ده وماتشغلش بالك.
ولما تحس إن تأنيب الضمير زاد أوي .. افتح الآسك واسأل واحد قل له أنا ثانوية عامة ومبدأتش مذاكرة، أعمل إيه؟
هو في الحقيقة الواحد في الحالة دي مش بيسأل السؤال ده عشان يعرف المفروض يعمل إيه!
إنما السؤال هيحسسني إن في جزء مني "لسه مهتم" ومشغول بالمسئولية الي عليّ، وإني مش مهمل ولا مبالي ومستهتر ومقضيها بنسبة مئة بالمئة، لا ده هيوهمني كمان إني "خدت خُطوة" وسعيت تجاه الصح =
وده هيقلل تأنيب الضمير ولو بنسبة 5%.
فأنا بقى المفروض أقولك كام كلمة تشجعك وأقولك لسه في فرصة وما تقلقش وابدأ بس، فالنسبة تزيد ل 20% مثلا.. ويبقى الوضع كما هو عليه .. بس هتلاقيك ارتحت شويه.
فكمل يا صديقي هروب، وصبّر نفسك بحبة أسئلة وطلب نصايح من وقت للتاني، المهم تتحمل تمن قراراتك وما تندمش.
جايز يكون كلامي قاسي حبتين، بس هو إحنا كده زي ما بنحتاج تشجيع بنحتاج الأسلوب ده، لأني طالب زيك ومريت بالي بتمر بيه ده وأقدر أفهم كويس ما يدور بداخلك الآن.
ربنا يوفقك إذا أخذت بأسباب التوفيق.
أحمد عبد المنصف
ليست هناك تعليقات:
إرسال تعليق